BLOGGER TEMPLATES AND TWITTER BACKGROUNDS »

الاثنين، 5 أكتوبر 2009

أنا ليه عايزة اتجوز؟؟؟



يمكن لاننا كبرنا على تصريحات المسئولين عن ارتفاع سن الجواز ونسبة العنوسة واتربينا على ضل راجل ولا ضل حيطة

وعشنا فى مجتمع اللى تعيش فية لوحدها تبقى من الشواذ المنبوذين المشكوك فى سلوكهم وأهليتهم

وان الرجال قومون على النساء على فكره دة مش كلامى دة كلام المؤلف اللى كتبة فى المسرحية........أه مسرحية

اصل دة دور بنت كان اسمها أمانى كنت بمثلة فى مسرح الجامعة

الدور مكنش دور بنت عانس بالعكس دى كانت مخطوبة لشاب صورلها خوفها من العنوسة انها بتحبة مع انها شايفاه ديما أنة مش مناسب ليها ومش هو ده الشخص اللى يستاهلها ولا اللى كانت بتتمناه لنفسها لانه فى نظرها انه انسان ضعيف ، وخايب ، وعاطل ، بس كانت ديما بتلتمسلة الاعذار بحال البلد والوضع المقلوب

واتخطبتلة لانها خايفة لتعنس وتبقى معيرة يعنى ضل راجل حتى لو كان راجل ورق ولا ضل الوحدة وكلام الناس ونظرتهم

وعلى فكرة دة نوع تانى من العنوسة

وبعد ما الناس اتفرجو على المسرحية وسقفوا أوى وخدنا مركز أول وشهادات تقدير ومادليات ذهبية وشيكات بمبالغ بسيطة

لاقتنى بسأل نفسى سؤال عمرى مسألتة لنفسى قبل كدة أنا لية عايزة اتجوز؟؟

ياترى لانى خايفة اكون ذى امانى عانس من النوع التانى

طبعا أنتو بتسألو نفسكو يعنى أية عانس من النوع التانى

هرد عليكو وقولكم انى بعد تفكير عميق وحسابات معقدة وسهر الليالى فى البحث وراء المعنى للنوع التانى من العنوسة وصلت الى رأى شخصى متواضع وهو ان هذا النوع من العنوسة هى البنت اللى اتجوزت او اتخطبت لاى واحد والسلام خوفا من ان المجتمع يلقبها بالعانس ولاكنها بتكون عانس فى داخلها لان اى بنت بتحلم بالراجل اللى هتتجوزة دة انة يكون فارس على حصان مش مهم يكون ابيض علشان الابيض بيتوسخ بسرعة بس لازم يكون شايل سيف مسنون يحارب بية الزمن الصعب دة والناس القاسية يقويها ويقوى بيها يساعدها فى انها تحلم حلم اكبر من حلم الفارس والحصان ويحاول يحققة معاها يسعدها يفرح قلبها يحتويها يكون ليها السند والامان.........

بس صحبتنا بتبتدى تتنازل عن احلامها حاجة حاجة أولهم انها تتخطب لواحد فارس صحيح بس من غير حصان وطبعا أكيد السيف وقع منة

وخوفها من العنوسة وارتباطها بواحد أقل منها فى حاجات كتير يسلب منها ارادتها و أحلمها وطموحتها وحدة وحدة وتبدأ رحلة التنازلات ابتداء من الموافقة بالارتباط بفارس بلا جواد وتقول هعمل اية مش احسن ما أعنس وصحبتنا دى بتعيش عانس طول عمرها جوة نفسها، عنوسة حلم الفارس اللى ضاع ومتحققش ، عنوسةالسيف اللى وقع ، عنوسة انها مبتبقاش قادرة تحارب غير نفسها ، عنوسة الندم على عمرها اللى راح مع واحد مش حاسس بيها ولا فهمها

عنوسة العيشة والسلام عشان العيال يتربو، عنوسة انى مش هلاقى حد يصرف عليا عنوسة التنازلات ، عنوسة الانكسار، عنوسة الهزيمة ، عنوسة الوحدة داخل ذاتها والنوع التانى من العنوسة محدش بيشوفة ولا بيحسة غير اللى عيشة لانها مدرية وراء لقب مدام فولان طب وأنا مالى وال الكلام دة

أنا لية عايزة اتجوز؟؟

وللحديث باقية